جب مرے دل کو تو دکھا دے گا
میرا رب مجھ کو حوصلہ دے گا
وحشتِ جاں لگام دے خود کو
دل کا آنگن تجھے دعا دے گا
اشک جینا حرام کر دیں گے
جب مجھے تو کبھی بھلا دے گا
روز مرتی ہوں روز جیتی ہوں
کب تلک تو بھلا سزا دے گا
میری سوچیں ہیں آئینہ میرا
یہ مرے زخم کو دوا دے گا
زندہ رہ جائیں گی فقط یادیں
وقت ہر ایک کو مٹا دے گا
جس نے پھینکا ہے دشت میں مجھ کو
جینا بھی وہ مجھے سکھا دے گا
شوق سے دل دکھا مرا لیکن
تیرا سایا تجھے دغا دے گا
اے شبِ ہجر نہ ستا مجھ کو
تیرا ہنسنا مجھے رلا دے گا
میں ہوں شاہین اور جنوں میرا
آسمانوں کو بھی جھکا دے گا