افضل احسن رندھاوا برسی تے اک نظم

احمد نعیم شہزاد
 

شاعر: احمد نعیم ارشد
دریاواں دا ہانی سی او
تاہیوں سُکے دریاواں دے
ہاڑے لکھدا رہندا سی
اپنے ناں دے وانگوں افضل
دیس پنجاب دا افضل پتر
سچا سُچا کھرا لکھاری
اپنی دھرتی دے دُکھ لکھدا
اپنی دھرتی ماں دا سیوک
سنیا اے دھرتی ماں دے نِگھ وچ
مٹھی نیندر جا ستا اے
بابا بُلھا کہندا سی نا
گور پیا کوئی ہور وے بیبا
سچی گل اے
اپنے ناں دے وانگوں افضل
ایس دھرتی دا افضل پُتر
مر کے وی او مریا نہیں اے
جیوندا اے جی
اپنیاں لکھتاں دے وچ اج وی
بول رہیا اے
لفظاں دے نیناں دے وچوں
ویکھ رہیا اے
بابا وارث سچ کہندا سی
جہڑے نیک کمائیاں کردے
سدا ہی جیوندے رہندے
سچی گل اے سجنو مترو
جد تک ایہ پنجاب رہوے گا
جد تک ماں بولی اے زندہ
جھوٹھی گل میں کر نہیں سکدا
افضل احسن مر نہیں سکدا
افضل احسن مر نہیں سکدا
احمد نعیم ارشد

You might also like

Leave A Reply

Leave Your Comments for this Post