شاعر: محمد جاوید انور
مجھے کچھ بے وزن سے
شعر کہنے ہیں
مجھے تم اذن دو
کہہ دوں
کہ جو کچھ دل میں ہے
ہر قید سے آزاد ہو کر
بول دوں
جو کچھ
کہ میری روح کی پاتال میں
قیدی پڑا ہے
ہاں سنو!
کچھ بے وزن سے
شعر کہنے دو
مجھے تم داد مت دینا
مرے الفاظ سن لینا
سمجھ لینا
نہ ان کو چیرنا
تقطیع کرنا
اور نہ اپنی سان پر چڑھا کے
ان کو دھار دینا
بس مرے لفظوں
کو سن لینا
سمجھ لینا
مجھے تم داد مت دینا
کنوارے لفظ سن لینا
(محمد جاوید انور)
کنوارے لفظ
