بُلھے شاہ دیاں کافیاں (۲)


بُلھے شاہ
(۱)
توں کدھروں آیا کدھر جاناں
اپڻا دس ٹکاناں
جس ٹھاڻے دا مان کریں
تیرے نال نہ جاسی ٹھاڻاں
ظلم کریں تے لوک ستاویں کسب پھڑیو لُٹ کھاڻاں
شہر خموشاں دے چل وسیّے
جتھے ملک سماناں
بھر بھر پور لنگھواے ڈاہڈا
ملک الموت مہاناں
کر لے چادڑ چار دیہاڑے
اوڑک توں اٹھ جاناں
اہناں سبھناں تھیں ایہہ بلھّا
اوگن ہار پراناں
توں کدھروں آیا کدھر جاناں
اپنا دس ٹکاناں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
(۲)
بے حد رمزاں دسدا نی ۔۔۔۔۔ ڈھولن ماہی
میم دے اوہلے وسدا نی ۔۔۔۔۔ ڈھولن ماہی
اولیاء منصور کہاوے
رمز اناالحق آپ بتاوے
آپے آپ نوں سولی چڑھاوے
تے کول کھلو کے ہسدا نی ۔۔۔۔۔ ڈھولن ماہی
بے حد رمزاں دسدا نی ۔۔۔۔۔ ڈھولن ماہی
میم دے اوہلے وسدا نی ۔۔۔۔۔ ڈھولن ماہی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
(۳)
الف اللہ دل رتّا میرا
“ب” دی خبر نہ کائی
“ب” پڑھدیاں مینوں سمجھ نہ آوے
لذّت الف دی آئی
“ع” تے “غ” نوں سمجھ نہ جاناں
گل الف سمجھائی
بُلھیا قول الف دے پورے
دل دی کرن صفائی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
(۴)
پڑتالی لاہون عشق کوں کھیڑے
نیوں لگا مت گئی گواتی
نحم اقرب ذات پچھاتی
سائیں بھی شاہ رگ توں نیڑے
پڑتالی لاہون عشق کوں کھیڑے
ہیرے ہو مُڑ رانجھا ہوئی
ایہہ گل ورلا سمجھے کوئی
چُک پئے سب جھگڑے جھیڑے
پڑتالی لاہون عشق کوں کھیڑے
لے برأٔتاں راتیں جاگن
نور نبی دے برسن لاگن
اوہو ویکھ اساڈے جھیڑے
پڑتالی لاہون عشق کوں کھیڑے
انالحق کہایا لوکا
منصور نہ دیندا آپے ہوکا
ملاں بن بن آئے بیڑے
پڑتالی لاہون عشق کوں کھیڑے
بلھّا شاہ شریعت قاضی
ہے حقیقت پر بھی راضی
سائیں گھر گھر نیاوں نبیڑے
پڑتالی لاہون عشق کوں کھیڑے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
(۵)
پیاریا سانوں مٹھڑا نہ لگدا شور میں تے راضی رہنا
پیاریا سانوں مٹھڑا نہ لگدا شور
میں گھر کھلا شگوفہ ہور
دیکھیاں باغ بہاراں ہور
ہن مینوں کجھ نہ کہایں
پیاریا سانوں مٹھڑا نہ لگدا شور میں تے راضی رہنا
ہن میں موئی نی میرئیے ماں
پُونی میری لے گیا کاں
ڈو ڈو کردی مگرے جاں
پُونی دئیں سائیں دے ناں
پیاریا سانوں مٹھڑا نہ لگدا شور میں تے راضی رہنا
بلھّا شوہ دے نال پیار
مہر عنایت کرے ہزار
ایہو قول تے ایہو قرار
دلبر دے وچ رہنا
پیاریا سانوں مٹھڑا نہ لگدا شور میں تے راضی رہنا

You might also like

Leave A Reply

Leave Your Comments for this Post