بُلھے شاہ دیاں کافیاں (۱)


بُلھے شاہ
(۱)
اُٹھ گئے ہن رہندے ناہیں
ہویا ساتھ تیار
ربا ہُن کیہ کرئیے
ڈھانڈ کلیجے بل بل اُٹھدی
بھڑکے برہوں نار
ربا ہُن کیہ کرئیے
بُلھا شوہ پیارے باہجھوں
رہے اُرار نہ پار
ربا ہُن کیہ کرئیے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
(۲)
پردہ کس توں راکھی دا
کیوں اوہلے بہہ بہہ جھاکی دا
پہلوں آپے ساجن ساجیدا
ہُن دسنائیں سبق نماجی دا
ہُن آیا آپ نظارے نوں
وچ لیلٰی بڻ بڻ جھاکی دا
پردہ کس توں راکھی دا
کیوں اوہلے بہہ بہہ جھاکی دا
شاہ شمس دی کھل لہائیو
منصور نوں چا سُولی دوائیو
زکرئیے سر کلوتر دھرائیو
کیہ لیکھا رہ گیا باقی دا
پردہ کس توں راکھی دا
کیوں اوہلے بہہ بہہ جھاکی دا
کن کہیا فیکون کہایا
بے چُونی دا چُون بڻایا
خاطر تیری جگت باُیا
سر پر چھتر لولاکی دا
پردہ کس توں راکھی دا
کیوں اوہلے بہہ بہہ جھاکی دا
ہُڻ ساڈے ول دھایا اے
نہ رہندا چھپا چھپایا اے
کِتے بلھّا نام دھرایا ہے
وچ اوہلا رکھیا خاکی دا
پردہ کس توں راکھی دا
کیوں اوہلے بہہ بہہ جھاکی دا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
(۳)
بھانوے جان نہ جان وے ویہڑے آ وڑ میرے
میں تیرے قربان وے ویہڑے آ وڑ میرے
تیرے جیہا مینوں ہور نہ کوئی ڈھونڈاں جنگل بیلا روہی
ڈھونڈاں تاں سارا جہان وے ویہڑے آ وڑ میرے
میں تیرے قربان وے ویہڑے آ وڑ میرے
لوکاں دے بھانے چاک مہیں دا رانجھا تاں وگاں وچ کہیندا
ساڈا تاں ایمان وے ویہڑے آ وڑ میرے
میں تیرے قربان وے ویہڑے آ وڑ میرے
ماپے چھوڑ لگی لڑ تیرے شاہ عنایت سائیں میرے
لائیاں دے لج پال وے ویہڑے آ وڑ میرے
میں تیرے قربان وے ویہڑے آ وڑ میرے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
(۴)
بھیناں میں کتدی کتدی ہُٹی
پڑی پچھی پچھواڑے رہ گئی ہتھ وچ رہ گئی جُٹی
اگے چرخہ پچھے پہیڑا میرے ہتھوں تند تُرٹی
بھیناں میں کتدی کتدی ہُٹی
بھوندا بھوندا میرا اُورا ڈِگا چِھب الجھی تند ٹُٹی
عاشق بکرا معشوق قصائی میں میں کردی کُھٹی
بھیناں میں کتدی کتدی ہُٹی
داج جواہر اس کیہ کرنا جس پریم کٹوری مُٹھی
اوہو چور میرا پکڑ منگاؤ جس میری جند کُٹھی
بھیناں میں کتدی کتدی ہُٹی
بھلا ہویا میرا چرخہ ٹٹا میری جند عذابوں چھٹی
بُلھا شوہ نے ناچ نچائے اوتھے دُھم پئی کر کُٹی
بھیناں میں کتدی کتدی ہُٹی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
(۵)
تاہنگ ماہی دی جلیاں
نت کانگ اڈاواں کھلیاں
کوڈی دمڑی پلّے نہ کائی
پار ونجن نوں میں سدھرائی
نال ملاح نہیں آشنائی
جھیڑا کراں وللّیاں
تاہنگ ماہی دی جلیاں
نت کانگ اڈاواں کھلیاں
نیں چندل دے شور کنارے
گھمڻ گھیر وچ ٹھاٹھاں مارے
ڈب ڈب موئے تارو بھارے
شور کراں تاں جھلیاں
تاہنگ ماہی دی جلیاں
نت کانگ اڈاواں کھلیاں
نیں چندل دے ڈوہنگے پاہے
تارو غوطے کھاندے آہے
ماہی منڈے پار سدھائے
میں کیوں رہیاں اکلّیاں
تاہنگ ماہی دی جلیاں
نت کانگ اڈاواں کھلیاں
نیں چندن دیاں تارو پھاٹاں
کھلی اڈیکاں ماہی دیاں واٹاں
عشق ماہی دے لائیاں چاٹاں
کوکاں تاں میں گلیاں
تاہنگ ماہی دی جلیاں
نت کانگ اڈاواں کھلیاں
پار جھناؤں جنگل بیلے
اوتھے خونی شیر بگھیلے
جھب رب مینوں ہی میلے
ایس فکر وچ گلیاں
تاہنگ ماہی دی جلیاں
نت کانگ اڈاواں کھلیاں
ادھی رات لٹکدے راتے
اک لٹکے اک لٹکڻ ہارے
میں اٹھ آئی ندی کنارے
پار لنگھن نوں کھلیاں
تاہنگ ماہی دی جلیاں
نت کانگ اڈاواں کھلیاں
میں من تارو سار کیہ جاناں
ونجھ چپہ نہ تلہ پوراناں
گھمن گھیر نہ ٹانگ ٹکاڻاں
تاہنگ ماہی دی جلیاں
نت کانگ اڈاواں کھلیاں
بلھّا شوہ گھر میرے آوے
ہار سنگار میرے من بھاوے
منہ مخٹ متھے تلک لگاوے
ویکھے تاں میں بھلیاں
تاہنگ ماہی دی جلیاں
نت کانگ اڈاواں کھلیاں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

You might also like

Leave A Reply

Leave Your Comments for this Post