اک غزل
شاعر: یوسف خالد
اساں بے قدراں نوں قدر سکھائی ہَس ہَس کے
اساں پیار دی نِگھی جوت جگائی ہَس ہَس کے
اساں ہاراں مَنیاں رشتے ثابت رکھن لئی
اساں طعنے جَھلے، پریت نبھائی ہس ہس کے
اساں تتی ریت تے جھلیاں دُھپاں ہاڑ دیاں
اساں تارے گِندیاں رات لنگھائی ہس ہس کے
اساں رُسیا ڈھول منایا ڈاہڈے وَختاں نال
اساں ڈھول نوں ساری گل سمجھائی ہس ہس کے
اساں بےدوسے ساں ،چپ کرکے سب سہندے ریئے
اساں رل وسن لئی گل مکائی ہس ہس کے
اساں خالد سارے سودے کیتے گھاٹے دے
اساں اپنی کلی آپے ڈھائی ہس ہس کے
یوسف خالد