چوٹی تے گنڈھ : یوسف خالد

عشق نہ پچھے ذات قبیلہ ”
عشق نہ پچھے عمراں ”
عشق دی منزل روپ دا درشن
روپ دیاں سو شکلاں
عشق اوّلے خاب وکھاوے
بُھلّی پَے جان عقلاں
عشق مریلا کجھ نہ ویکھے
رول دیندا وچ تَھلاں
کچا روڑھ کے پکا کردا
وچ دریا ئی چَھلاں
عشق کہانی مٹ نئیں سکدی
کرے لوکائی گلاں
کھڑی شریف دے میاں صاحب
مکدی گل مکائی
"جس تن اندر عشق نہ رچیا
کُتّے اس تھیں چنگے
مالک دے در راکھی کر دے
صابر بُھکھے ننگے”
فر اک تھاں تے میاں صاحب
چوٹی تے گنڈھ پائی
بول سُلَکھنے بول کے
میاں صاحب نے فرمایا
"عشقے باہجھ محمد بخشا
کیہہ آدم کیہہ کُتے”