پی لینے آں ، کھا لینے آں
سو لینے آں ، گا لینے آں
ویلا اینج ٹپا لینے آں
سبزی ، دال پکانی سکھ لئی
چھت تے منجی ڈاہنی سکھ لئی
لاک ڈاؤن دے چار دناں وچ
روٹی گول پکانی سکھ لئی
پانڈے شانڈے دھون توں پہلاں
لیمن میکس لگا لینے آں
ویلا اینج ٹپا لینے آں
ہتھ ملان توں ڈردے سارے
جپھی پان توں ڈردے سارے
اک میٹر دی دوری ، اُتوں
ماسک چڑھا کے پھردے سارے
ویکھو ویکھ اساں وی کہنی
کہنی نال رلا لینے آں
ویلا اینج ٹپا لینے آں
سارے یار پرانے لُک گئے
ہوٹل دے سب کھانے مُک گئے
نکے جئے وائرس دے ہتھوں
دنیا دے کم سارے رُک گئے
نظماں وچ بدرؔ نوں اپنے
دل دا حال سنا لینے آں
ویلا اینج ٹپا لینے آں
ویلا اینج ٹپا لینے آں : ڈاکٹر بدر شہزاد
